Песков: Зеленски да преговара за да не изгуби повеќе територија

Од страна на
Вечер
-
0
EPA/MAXIM SHEMETOV/POOL

Кремљ во вторник го повика украинскиот претседател Володимир Зеленски да преговара „сега“ за да избегне ризик од губење на нова територија, еден ден по изненадувачкото објавување на американскиот предлог за прекин на конфликтот со Русија.

„Подобро е да се преговара и да се прави тоа сега, а не подоцна. Просторот за донесување одлуки за него се намалува бидејќи губи територија во офанзивата на руските сили“, изјави портпаролот на Кремљ, Дмитриј Песков, за време на редовната прес-конференција.

Сепак, тој рече дека Москва официјално не добила детали за предлогот на Вашингтон.

Украинскиот претседател Володимир Зеленски вчера, по средбата во Киев со висок американски функционер кој му го презентираше планот на Вашингтон за прекин на војната со Русија, изјави дека бара достоинствено мировно решение.

Зеленски денес ќе разговара телефонски со француските, британските и германските лидери за планот на САД за прекин на војната, кој бара големи украински отстапки кон Русија, соопштија украински и британски претставници. Тој ќе разговара телефонски со францускиот претседател Емануел Макрон, германскиот канцелар Фридрих Мерц и британскиот премиер Кир Стармер, изјави за АФП висок украински функционер под услов да остане анонимен.

Луѓе запознаени со планот предложен од САД изјавија дека САД и Русија изготвиле план кој бара големи отстапки од Киев, вклучително и исполнување на територијални и други барања што Кремљ постојано ги поставуваше од почетокот на инвазијата пред речиси четири години.

Клучен украински преговарач денес изјави дека Украина нема да прифати никаков план што ги преминува нивните црвени линии.

„Не може да има одлуки надвор од рамките на нашиот суверенитет, безбедноста на нашиот народ или нашите црвени линии“, напиша на Фејсбук Рустем Умеров, секретар на Советот за национална безбедност на Украина.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ