Перуански суд го осуди поранешниот левичарски претседател Педро Кастиљо на 11,5 години затвор во средата за бунт и заговор против државата кон крајот на 2022 година, кога неуспешно се обиде да го распушти Конгресот и да преземе овластувања надвор од оние на претседателот, објави Ројтерс.
Затворската казна на Кастиљо дојде само еден ден откако друг поранешен претседател, Мартин Вискара, беше осуден на 14 години затвор за примање мито години пред да ја преземе функцијата.
За време на своите завршни зборови на судењето минатата недела, поранешниот претседател ги негираше обвиненијата за бунт, велејќи дека кога се обидел да го распушти Конгресот, само читал „документ без последици“.
Кастиљо и Вискара се приклучуваат на списокот на поранешни лидери затворени во јужноамериканската земја, каде што пет поранешни претседатели издржуваат затворски казни.
Перу имаше шест претседатели од 2018 година, среде низа отповикувања и оставки, често поради корупциски скандали.
По Кастиљо, неговата тогашна потпретседателка Дина Болуарте ја презеде функцијата, а таа беше отстранета откако Конгресот ја прогласи за „морално неспособна“ да ја води земјата.
Таа беше заменета од Хозе Херера, чиј претседателски мандат завршува во јули 2026 година, а претседателските избори во Перу се закажани за април следната година.
