Општина Ѓорче Петров денеска официјално го отвори новиот пензионерски клуб во просториите на урбаната заедница Мирче Ацев.
Со ова, пензионерите од овој дел на Општината добиваат функционален и пријатен простор за дружење, рекреација и секојдневни активности.
Градоначалникот на Општина Ѓорче Петров, Александар Стојкоски, истакна дека вложувањето во подобри услови за пензионерите останува приоритет на Општината.
– Нашите највозрасни сограѓани заслужуваат внимание, почит и услови за квалитетен живот. Тие се најактивната група во општината, ангажирани, посветени и секогаш подготвени да дадат придонес во заедницата. Отворањето на овој клуб е чекор кон нивна поголема вклученост и социјализација – изјави Стојкоски.
Пензионерскиот клуб ќе служи како отворен простор за реализирање различни програми, културни настани, едукативни и спортски активности за пензионерите.
Општина Ѓорче Петров продолжува со активностите насочени кон унапредување на животот на сите генерации, со акцент на создавањето можности за достоинствено стареење.
