Во Германија, на крајот на септември, дури 755.300 пензионери примале социјална помош наменета за граѓани кои не можат да ги покријат своите основни трошоци за живот со сопствени приходи, што претставува рекордно ниво, според најновите податоци од Федералниот завод за статистика.
Правото на таканаречената основна поддршка им се доделува на оние чии месечни приходи не достигнуваат 1.062 евра, но оваа граница не важи подеднакво за сите, бидејќи износот се пресметува индивидуално, во зависност од реалните трошоци за живот, првенствено домувањето.
Во споредба со истиот период минатата година, бројот на пензионери кои примаат дополнителна државна финансиска помош се зголемил за 25.000, што дополнително го потврдува растечкиот проблем со сиромаштијата кај постарото население.
Претседателката на левичарската партија БСВ, Сара Вагнкнехт, предупреди дека сиромаштијата во староста е веќе „огромен проблем“ во Германија и дека постојните трендови укажуваат на нејзино понатамошно продлабочување.
Една од клучните причини за зголемувањето на трошоците за живот е драстичното зголемување на кириите. Во поголемите градови, како што е Берлин, цените на кириите се зголемија повеќе од двојно во изминатата деценија, што особено ги погодува пензионерите со фиксни и ниски приходи.
Експертите предупредуваат дека без сериозни реформи во пензискиот и станбениот систем, бројот на постари граѓани кои зависат од државна помош би можел да продолжи да расте во наредните години.
