Педесет од 303 ученици претходно киднапирани од католичко училиште во Нигерија избегаа и сега се со своите семејства, соопшти денес раководството на училиштето.
Претседателот на Христијанското здружение на Нигерија и директор на училиштето, Булус Даува Јохана, изјави дека учениците, на возраст меѓу 10 и 18 години, избегале поединечно помеѓу петок и сабота.
„Успеавме да го потврдиме ова кога решивме да контактираме и да посетиме некои родители“, рече Јохана.
Тој додаде дека 253 ученици и 12 наставници сè уште се во заробеништво од киднаперите.
Учениците, заедно со нивните наставници, беа киднапирани од вооружени лица во петокот од римокатоличкото училиште „Света Марија“ во оддалечената заедница Папири во државата Нигер.
Ниту една група сè уште не ја презеде одговорноста за киднапирањата, а властите соопштија дека тактички тимови биле распоредени заедно со локалните ловци за да ги спасат децата.
Не беше веднаш јасно каде се држат децата или како успеале да се вратат дома.
Нигериската војска и полиција не дадоа веднаш коментар.
