Пцовиса нилскиот коњ Берта во Зоолошка градина – Битола. Оттаму информираат дека Берта била родена пред 40 години во Зоолошката градина во Виена.
– Берта беше омилена радост на нашите најмлади гости повеќе од една деценија. Пред да се пресели во нашата Зоолошка градина, Берта, близу 40 години, се дружеше со жителите и со посетителите и на зоолошките градини во Скопје, Белград и во Виена, од каде што и потекнуваше – соопштија од Управата на оваа установа.
Оттаму додаваат дека Берта има свои потомци во зоолошките градини во Виена, Белград и Скопје.
– И покрај длабоката старост, таа беше со солидно здравје, а во последниот период добиваше континуирана нега и терапија од нашиот ветеринар, но природниот крај за овој животински вид на оваа возраст беше неизбежен – информираа од Зоолошката градина.
Во Зоолошката градина – Битола има современо живеалиште за нилски коњ и токму затоа Менаџментот на Зоолошката ќе се обиде да обезбеди друг нилски коњ, бидејќи живеалиштето за овие животни е современо.
Планот е во оваа Зоолошка градина, во текот на оваа година, да се изградат нови живеалишта за копитари, за фламинго птици, како и терариум.
