Папата за бракот: „Стабилна заедница е меѓу маж и жена“

Во своето прво обраќање пред светските дипломати во Ватикан, папата Лав XIV во петокот рече дека достоинството на мигрантите мора да се почитува и ги повика нациите да го замрзнат производството на оружје и да им дадат приоритет на мировните напори.

Папата, кој е од Соединетите Американски Држави, но живеел во Перу неколку години, се опиша себеси како „потомок на имигрантите“ и повика на сочувство и солидарност со раселените лица.

Папата го искористи своето обраќање за да го повтори традиционалното црковно учење за бракот, потврдувајќи дека тој е „стабилна заедница меѓу мажот и жената“ и ја нагласи важноста на семејството како основа за хармонија во општеството.

Лав XIV, кој беше избран за папа минатата недела, го проткајува својот говор со теми за мир, правда, верска слобода, основните причини за конфликтот и потребата од мултилатерална дипломатија.

Новиот папа рече дека искуството од живеењето во Северна и Јужна Америка и патувањето низ светот му дало способност „да ги надмине границите за да запознае различни луѓе и култури“.

Лав XIV. исто така посочи дека ќе ја продолжи традицијата на неговите претходници и ќе патува низ светот.

Тој го потврди ставот на Црквата против абортусот и рече дека Црквата нема да се двоуми да употреби „директен јазик“ за да им ја каже вистината на моќниците.

Папата ги издвои само Блискиот Исток и Украина и рече дека денеска луѓето таму „најмногу страдаат“.