Папата со повик до Трамп: „Се надевам дека бара излез, се надевам дека бара начин да го намали насилството“

Папата Лав XIV во вторник го повика американскиот претседател Доналд Трамп да најде „излез“ за да се стави крај на војната во Иран, редок директен апел од поглаварот на Католичката црква во време кога регионалниот конфликт ескалира. Невообичаениот повик го упати папата, првиот од Соединетите Држави, до новинарите пред неговата резиденција во Кастел Гандолфо, во близина на Рим, објави „Ројтерс“.

„Ми беше кажано дека претседателот Трамп неодамна рекол дека сака да ја заврши војната“, рече папата Лав. „Се надевам дека бара излез. Се надевам дека бара начин да го намали количеството насилство“.

Папата Лав XIV, познат по својот внимателен избор на зборови, ретко упатува директни апели до националните лидери, но во последните недели ги засили критиките за војната во Иран. Во неделата, тој со невообичаено остри зборови рече дека Бог ги отфрла молитвите на лидерите кои започнуваат војни и чии „раце се полни со крв“.

Конфликтот што трае еден месец во Иран започна на 28 февруари со заеднички воздушни напади на САД и Израел. Оттогаш се прошири низ регионот, убивајќи илјадници и предизвикувајќи енергетски прекини што се закануваат да ја турнат глобалната економија во криза.

Папата во вторник изрази жалење за големиот број жртви и се надева дека насилството би можело да заврши пред Велигден, кој се слави на 5 април. „Имаше толку многу смртни случаи, вклучително и невини деца“, рече тој. „Да продолжиме да повикуваме на мир без престан“.

„Има премногу кои промовираат конфликт, насилство и војна“, заклучи папата Лео.