Папата Лав XIV ќе живее во Апостолската палата во Ватикан, за разлика од поранешниот папа Франциск кој живееше во Домот на Света Марта, односно хотелот во Ватикан.
Папските апартмани го зафаќаат горниот кат од палатата, зграда од 16 век со поглед на плоштадот „Свети Петар“. Тие имаат околу 10 соби, вклучувајќи спална соба, приватна библиотека и студија, трпезарија, кујна и капела.
Резиденцијата не се користи како папски дом од 2013 година, кога папата Бенедикт XVI ја напушти палатата откако се повлече од функцијата.
Реновирањето на палатата е во тек, а се очекува папата Лав да се пресели некое време по неговата инаугуративна миса, која се одржа денеска, изјави за Ројтерс официјален претставник на Ватикан.
Друг функционер рече дека Ватикан верува оти ќе биде полесно да се обезбеди безбедноста на новиот папа во палатата отколку во хотелскиот објект каде што живеел папата Франциск.
Тој беше првиот папа од 1870 година кој не живеел во палатата, избирајќи наместо тоа да има резиденција во ватиканскиот хотел Санта Марта, објект во близина на јужниот ѕид на градот-држава во кој се сместени свештеници и други гости на Ватикан.
На Франциск не му се допаѓале некои од големите обележја на папството и рекол дека претпочита да живее во заедница поради своето „психолошко здравје“. Сепак, покојниот папа ја користел палатата за своите официјални состаноци и обично одржувал неделни молитви од прозорците на зградата.
