Папата ги воодушеви новинарите во Ватикан: „Мора да кажеме не на војната со зборови“

Папата Лав XIV утрово, за прв пат по неговиот избор за 267-ми поглавар на Католичката црква, се сретна во Ватикан со новинари кои известуваа од конклавата и настаните по смртта на неговиот претходник Франциск во последните денови и недели.

Во салата Павле VI, папата меѓудругото, им зборуваше за одговорноста за пишаниот збор, апелираше до нив да бидат миротворци во своите постапки („Мирот започнува со секој од нас, мора да кажеме „не“ на војната на зборови и фотографии“) и повика на ослободување на затворените новинари низ целиот свет.

„Разоружајте ги зборовите и ќе помогнеме во разоружувањето на Земјата“, рекол, меѓу другото, Лав XIV.

Италијанските медиуми објавија дека на крајот од средбата, тој долго време се движел низ претставници на медиумите, давајќи автограми и позирајќи за селфиња. Еднаш дури и потпишал бејзбол палка за новинар. Во еден момент, објави „Скај њуз“, тој поминал покрај новинар пред камерата, кој бил облечен во бело и се пошегувал.

Новинарите беа највоодушевени кога му предложија, бидејќи е голем љубител на тенисот, да се обиде да организира добротворен тениски натпревар за Папските мисионерски друштва, институција која им помага на сиромашните во неразвиените земји низ целиот свет.

„Ќе го доведам Агаси“, шегувајќи се предложи еден од новинарите, на што Папата одговори:

– Само не го доведувај Синер.

Тој, се разбира, мислеше на тенисерот број еден во светот, но тоа има двојно значење бидејќи „sinner“ значи „грешник“ на англиски.