ПАНИКА ВО АМЕРИКА: Шефот на Пентагон покани стотици генерали на таен состанок

Американскиот министер за одбрана Пит Хегсет им нареди на стотици генерали и адмирали итно да се соберат во базата на морнаричката пешадија во Вирџинија следната недела, но причината за состанокот е обвиткана во тајност, предизвикувајќи конфузија и загриженост во воените кругови по серијата пресврти во администрацијата на Трамп.

Пентагон покани воени претставници од целиот свет, а дури ни врвните генерали и нивните штабови не знаат зошто, објавува „Вашингтон пост“.

До речиси секој висок воен командант низ целиот свет е испратена многу необична директива, потврдија повеќе од десетина извори запознаени со ситуацијата. Наредбата беше издадена претходно оваа недела, во време кога се наближува затворањето на владата и месеци откако тимот на Хегсет објави планови за широка консолидација на воените команди.

Портпаролот на Пентагон, Шон Парнел, потврди дека Хегсет „ќе се обрати на своите високи воени лидери на почетокот на следната недела“, но не понуди дополнителни детали. Средбата е закажана за вторник во Квантико, Вирџинија.

Наредбата на Хегсет се однесува на приближно 800 генерали и адмирали распоредени низ САД и светот, поточно на сите високи офицери со ранг на бригаден генерал или повисок на командни позиции, како и на нивните главни советници-подофицири. Се очекува пристигнување на команданти од конфликтни зони и оние стационирани во Европа, Блискиот Исток и Азиско-пацифичкиот регион.

Ниту еден од луѓето со кои разговараше „Пост“ не можеше да се сети дека некој министер за одбрана некогаш наредил таков масовен собир, а неколкумина изразија загриженост за безбедноста.

– Луѓето се многу загрижени. Тие немаат поим што тоа значи – рече еден извор.

Други изразија фрустрација што дури и командантите стационирани во странство се замолени да присуствуваат, велејќи „така не се прави тоа“.

„Не ги покануваш генералите и адмиралите кои ги водат своите луѓе и глобалните сили во сала надвор од Вашингтон без да им кажеш зошто или која е темата или агендата“, рече едно лице.

– Дали сега ги повлекуваме сите генерали и адмирали од Пацификот? Сето тоа е чудно – додаде друг американски функционер.