Цените на нафтата нагло паднаа поради надежите за договор што би можел да ја заврши војната меѓу САД и Израел со Иран. Американскиот државен секретар Марко Рубио изјави дека преговарачите имаат „прилично солиден предлог на маса“ и дека договор за завршување на конфликтот може да се постигне уште денес.
Цените на нафтата на светските пазари до крајот на вчерашниот ден се намалија за речиси шест проценти, при што меѓународниот референтен бренд Брент се движи околу 98 долари за барел, а американската сурова нафта WTI на 91 долар за барел.
Падот дојде откако растеше оптимизмот дека САД и Иран наскоро би можеле да постигнат договор за прекин на конфликтот и повторно отворање на Ормутскиот теснец, објави „Трејдинг економикс“.
Сепак, претставници од двете страни предупредуваат дека клучните прашања сè уште не се решени, пренесува Танјуг.
Американскиот претседател Доналд Трамп изјави дека договорот со Иран „или ќе биде значаен или нема да го има“, додека иранското Министерство за надворешни работи изјави дека е постигнат напредок во преговорите, но дека конечниот договор сè уште не е блиску.
Пазарите беа дополнително охрабрени од податоците што укажуваат на постепена нормализација на морскиот сообраќај низ Ормутскиот теснец, еден од најважните енергетски коридори во светот.
Според податоците за следење на бродовите, неколку танкери со течен природен гас поминале низ теснецот без поголеми прекини во последните денови, што помогнало да се ублажат загриженостите на инвеститорите за евентуално нарушување на снабдувањето со енергенси.
