Како резултат на невремето со силен ветар кое во саботата во попладневните часови го зафати Градот Скопје, се вжешти бројот за итни повици 112, при што беа пријавени паднати дрвја, скинати кабли на ЕВН и во мал дел оштетување на приватна сопственост (моторни возила, натстрешници, лимени покриви и друго).
Нема официјални информации за повредени, а од ЦУК велат дека нивните служби се на терен и ја проценуваат состојбата. За време на невремето се појавија повеќе пожари на отворено во Скопскиот Регион, но истите се изгаснати, или се ставени под контрола
Како резултат на невремето со силен ветар кое во саботата во попладневните часови го зафати Градот Скопје, се вжешти бројот за итни повици 112, при што беа пријавени паднати дрвја, скинати кабли на ЕВН и во мал дел оштетување на приватна сопственост (моторни возила, натстрешници, лимени покриви и друго).
– На Единствениот повикувачки број за итни случаи 112 во ЦУК се добиени повеќе пријави за штети и информации за опасности за граѓаните и околината, настанати од невремето во Скопје, што зафати дел од градот. Сите пријави се проследени до надлежните служби, кои интервенираат по приоритет со цел надминување на настанатата состојба – информираа од ЦУК.
Нема официјални информации за повредени, а од ЦУК велат дека нивните служби се на терен и ја проценуваат состојбата.
Од невремето, проследено со силен ветар, во Ѓорче Петров, на улицата „Македонска војска“ беше паднат покрив од дваесетметарска зграда, под чии остатоци останаа заробени две возила. Веднаш се интервенираше со механизација во расчистување на остатоците од покривот. Паднати дрвја имаше и во Паркот во Ѓорче Петров, во населбата Даме Груев, во Ново Село во потегот накај Мага Паркот и на други места.
– Има големи материјални штети. Благодарност до сите што помогнаа да се отстрани паднатиот покрив на зградата. Останува да ги санираме паднатите дрва, се оспособува уличното осветлување, одредени делови кои се напојуваат од трафостаница Нерези можно е да имаат проблеми со довод на струја, а екипите на ЕВН работат на санација – истакна градоначалникот на општина Ѓорче Петров, Александар Николоски.
Додека траеше невремето, се појавија пожари на неколку локации во Скопскиот Регион. Полициски службеници ангажирани за физичко обезбедување на меѓународниот ракометен турнир заедно со екипа од противпожарна заштита спречија ширење на пожарот, кој во саботата околу 16 часот изби во непосредна близина на спортскиот центар „Борис Трајковски“.
Како што соопшти МВР, полицајците и пожарникарите спречиле пожарот да ги зафати моторните возила и објекти како и лизгалиштето што е во склоп на спортскиот центар. Направена е и евакуација на учесниците на турнирот и на сите други спортски работници и публика. Како последица на настанатиот пожар, девет полициски службеници беа однесени на кислородна поддршка на Одделот за токсикологија поради вдишување на чад и се во стабилна состојба.
Градоначалникот на општина Бутел, Дарко Костовски, пријави за подметнат пожар до градинката и училиштето „Св. Климент Охридски“, но со брзата реакција на полицијата и пожарникарите веднаш е локализиран.
– До каде ќе оди лудоста!? Дефинитивно станува збор за подметнување со цел опожарување на новоизградената детска градинка – објави Костовски на „Фејсбук“.
Тој додаде дека МВР интензивно работи на расветлување на случајот.
– Ќе бидат поставени и целовечерни полициски патроли. На терен ќе биде и општинскиот кризен штаб. Тоа што го градиме треба да го чуваме, овие неразумни пориви нема да не донесат никаде – истакна Костовски.
И други пожари се појавија во Скопскиот Регион, но истите се изгаснати, или се ставени под контрола.
– Скопскиот Регион беше зафатен со силно невреме проследено со силен ветар при што речиси истовремено избија повеќе пожари на отворен простор кои беа видливи од поголемиот дел на градот Скопје и предизвикаа вознемиреност помеѓу граѓаните – истакна директорот на Дирекцијата за заштита и спасување, Стојанче Ангелов.
Тој напомена дека во периодот додека беснееле овие пожари на отворен простор, во регионот на аеродромот „Скопје“ дуваше силен ветар проследен со силен дожд поради што „ер тракторите“, како и армискиот хеликоптер, иако биле во состојба на готовност, не можеле да полетаат и да дадат поддршка на пожарникарите.
(С. Бл.)
