Ова се новите „ветени“ земји

Германија повеќе не е земјата со најголем број баратели на азил во Европската Унија, покажуваат новите податоци од Агенцијата за азил на ЕУ (EUAA).

До крајот на јуни 2025 година, Франција (78.000) и Шпанија (77.000) примиле повеќе барања од Германија (70.000), која е главна дестинација за барателите на азил во последните години, објавуваат медиумите.

Во првите шест месеци од оваа година, земјите од ЕУ, заедно со Норвешка и Швајцарија, примиле вкупно 399.000 барања за азил, што е пад од 23% во споредба со истиот период во 2024 година.

Бројот на барања од сириски граѓани е особено намален, за околу 25.000, по падот на режимот на Башар ал-Асад во декември минатата година.

Најголемите падови се забележани во Германија (43%), Италија (25%) и Шпанија (13%), додека бројот на барања во Франција остана речиси непроменет. Заедно, овие четири земји сочинуваат речиси три четвртини од сите апликации во ЕУ.

Венецуелските мигранти станаа најголемата група баратели на азил во ЕУ: во првата половина од 2025 година, тие поднеле околу 49.000 барања, за една третина повеќе од претходната година. Ова значи дека ги престигнале Сиријците по една деценија, според анализата на EUAA.

Експертите веруваат дека ова зголемување е поврзано со построгите имиграциски политики во САД, каде што администрацијата на Доналд Трамп ја укина привремената заштита за повеќе од 250.000 Венецуелци. Спротивно на тоа, венецуелските граѓани можат да влезат во ЕУ без виза и да останат до 90 дена, што им овозможува директно да аплицираат за заштита во европските земји.

Шпанија е главната дестинација, со 93% од апликациите поднесени таму, благодарение на заедничкиот јазик и постоечката дијаспора.