„Ова е вистината на повредените“: Support Kocani објави ВОЗНЕМИРУВАЧКИ ФОТОГРАФИИ од последиците кај младите по пожарот во „Пулс“

По пожарот кој се случи во дискотеката “Пулс” во Кочани кој однесе многу млади човечки животи, но остави и многу млади со трајни последици, граѓанската иницијатива Support Kocani објави вознемирувачки фотографии од тешките изгореници кај младите повредени во пожарот во таканаречената дискотека „Пулс“.

Од SupportKоcani истакнуваат дека ова е вистината на повредените во пожарот во  „Пулс“.

На фотографиите се прикажани изгореници на лице и екстремитети, со цел – како што велат од иницијативата – „надлежните конечно да сфатат колку се сериозни последиците од оваа трагедија“. Повеќе од 50 деца моментално и после 2 месеци од настанот имаат вакви или слични повреди на главата и лицето.

Support Kocani останува активен глас на јавноста во барањето институционална одговорност и конкретна поддршка за жртвите.

Од иницијативата претходно упатија и критики за несоодветните услови за лекување во Кочанската болница, предупредувајќи дека жртвите не смеат да бидат оставени сами да се справуваат со последиците од трагедијата.

Од таму го нагласија и тоа колку е скап процесот на рехабилитација за преживеаните.

Според нив, едно парче компресивна облека, неопходна за третман на изгореници и минимизирање на лузни, чини од 100 до 1.200 евра, а некои деца ќе имаат потреба од пет до шест парчиња.