Отворен 82-от Венециски филмски фестивал, Златен лав за животно дело на Вернер Херцог

82-от Меѓународен филмски фестивал во Венеција на Лидо (Мостра) беше официјално отворен во среда вечерта со светската премиера на „Ла Грација“ од италијанскиот режисер Паоло Сорентино.

За време на церемонијата, американскиот режисер Франсис Форд Копола му го додели Златниот лав за животно дело на германскиот режисер Вернер Херцог, кој им се заблагодари на организаторите на фестивалот и на присутните.

„Мостра отсекогаш ми била дом. Тука можев да се сретнам со моите колеги, публиката и пријателите. Фрeнсис, се познаваме половина век – ти сè уште ме инспирираш. Животот беше добар кон мене. Секогаш се обидував да бидам добар војник на филмот. Ова бара упорност и чувство на должност“, рече Херцог, чиј нов документарец „Ghost Elephants“ ќе биде премиерно прикажан денеска.

Церемонијата на отворањето ја водеше актерката и комичарка Емануела Фанели, која вечерта ја започна со читање писмо од претседателот на Италија, Серџо Матарела, во кое тој изрази благодарност за поканата да учествува во видео скечот што го отвори настанот, но – со допир на хумор – го одби, пренесува Танјуг.

„Признавам дека почувствував искушение да бидам ваш партнер во скечот, но сфатив дека глумата бара и талент, а се плашам дека го немам. Особено не на моите години, кои веќе не се младешки“, рече тој.

Матарела, исто така, се осврна на забелешката на водителката дека се плаши да не му каже нешто неточно.

„Не грижете се. Средбата со луѓе кои зборуваат неточно не е редок настан, дури ни во животот на претседателот на Републиката“, додаде тој.

На крајот од писмото, Матарела рече дека филмот е составен и неопходен дел од италијанската култура.

На филмскиот фестивал во Венеција, кој трае до 7 септември, ќе бидат прикажани повеќе од 70 филмови во официјалната селекција, а публиката и стручното жири можат да очекуваат бројни премиери, како што се „Франкенштајн“ од Гилермо дел Торо, филмот „Куќа на динамит“ од Кетрин Бигелоу, научно-фантастичниот филм „Бугонија“ од Јоргос Лантимос, филмот „Татко, мајка, сестра, брат“ од Џим Џармуш и филмот „Џеј Кели“ од Ноа Баумбах.

Црвениот тепих беше преплавен и од голем број холивудски ѕвезди, како што е американскиот актер Џорџ Клуни, кој пристигна во Венеција со сопругата Амал по вода, пред премиерата на филмот „Џеј Кели“ во режија на Ноа Баумбах.

Меѓу другите познати имиња во Венесија се појавија Џулија Робертс, Ема Стоун, Двејн Џонсон, Адам Сандлер, Лора Дре, Џад Лоу, Кејт Бланшет, Лени и Хајди Клум и други.

Медиумите известуваат дека фестивалот е отворен во напнати геополитички околности, поради војната во Газа.

Демонстрантите држеа транспаренти на кои пишуваше „Слободна Палестина“ и „Стоп на геноцидот“ пред главната зграда на Венецискиот филмски фестивал во среда, неколку часа пред ѕвездите да прошетаат по црвениот тепих.

Околу 20 лица од регионален левичарски италијански политички колектив држеа рачно нацртан транспарент и палестински знамиња пред церемонијата на отворање.

Протестите организирани од локални групи беа планирани за викендот во Венеција, а многу италијански филмски експерти, исто така, инсистираа фестивалот да заземе поцврст став кон војната во Газа.