Меѓународна криминална мрежа што профитирала од трговија со кокаин за италијански организирани криминални групи, е разбиена по детална истрага што ја следела трагата на парите низ Европа, соопшти „Европол“.
Мрежата, која служела како средство за перење пари за италијанските мафијашки групи Камора и Ндрангета, оперирала преку фиктивни компании, лажни фактури и луксузни инвестиции, така што биле проневерени милиони евра од кокаин и повторно инвестирани во европската економија. Истрагата, која ја спроведуваше француската национална жандармерија во соработка со италијанските карабинери и со швајцарската федерална канцеларија на полицијата, ја откри операцијата што опфатила повеќе европски земји. Во истрагата учествувале и белгиската федерална судска полиција, бугарската Државна агенција за национална безбедност, германската царина, како и еквадорската национална полиција, во координација на „Европол“ и „Евроџаст“.
Финансиската истрага покажа дека мрежата за перење пари била директно поврзана со голем трговски пат за кокаин од Јужна Америка кон Европа. Високорангиран на списокот на осомничени на „Европол“ во мрежата е црногорски државјанин, кој бил баран во неколку европски земји, а живеел во областа Кан во Франција.
