Откриен е хибриден сој на опасен вирус, експертите се загрижени

Британските научници открија нов сој на вирус на мајмунски сипаници (mpox) кај лице кое неодамна се вратило од Азија, а експертите го опишуваат како „токму она од што се плашеле“, објави „Дејли стар“.

Станува збор за „хибриден“ и „рекомбинантен“ сој, што значи дека носи генетски материјал од две различни генетски групи на вируси што моментално циркулираат низ целиот свет.

Агенцијата за здравствена безбедност на Обединетото Кралство (UKHSA) го пријави откритието на Светската здравствена организација (СЗО).

Д-р Богума Титанџи, доцент по медицина на Универзитетот Емори во Атланта, предупредува дека новооткриениот сој содржи елементи од клад I и клад II на мајмунските сипаници. „Тоа претставува точно она што експертите во оваа област стравуваа дека ќе се случи ако вирусот продолжи да се шири глобално без решителен одговор за да се запре“, рече Титанџи.

Тој објаснува дека мајмунските сипаници припаѓаат на група вируси познати по нивната способност да се рекомбинираат и да создаваат нови варијанти. „Клучното прашање сега е дали вакви настани ќе ја променат преносливоста или вирулентноста на вирусот. Колку повеќе дозволуваме мајмунските сипаници да циркулираат, толку повеќе можности има вирусот за рекомбинација и адаптација“, додава Титанџи.

UKHSA моментално ја проценува важноста на ова откритие и можноста новиот сој да се однесува поинаку. „Геномското тестирање ни овозможи да откриеме нов сој на мајмунски сипаници. Нормално е вирусите да еволуираат, а понатамошната анализа ќе ни помогне подобро да разбереме како се менуваат мајмунските сипаници“, објасни д-р Кети Синка, раководител на Одделот за сексуално преносливи инфекции во UKHSA.

Мајмунските сипаници се вирусна болест која предизвикува симптоми како што се треска, главоболка, болки во мускулите и карактеристичен осип со плускавци слични на сипаници.

Се пренесува преку близок контакт со заразени луѓе, животни или контаминирани предмети. Инфекцијата обично се јавува во централна и источна Африка, но по значителната епидемија во 2022 година, има глобално зголемување на случаите.

„Иако инфекцијата со мајмунски сипаници е блага за многумина, таа може да биде и посериозна. Вакцинацијата се покажа како ефикасен начин за заштита од потешки болести, затоа осигурајте се дека ќе се вакцинирате ако сте подобни“, повикува Синка.