Со богата програма. Општина Гевгелија во соработка со повеќе јавни установи и здруженија на граѓани ќе одбележи 80 години од ослободувањето на градот. Станува збор за осумдневни културно-уметнички и спортски настани.
Чествувањето на 7 Ноември – Денот на ослободувањето на Гевгелија ќе започне утре, со изложба и концерт на етнокореолошкиот сектор при Домот на култура „Македонија, коишто ќе се одржат во Народниот театар, со почеток во 19:00 часот.
На 5 ноември, 2024 година, во организација на Домот на културата „Македонија“, во Народниот театар ќе гостува ансамблот при НУКЦ „Трајко Прокопиев“- Куманово со театарската претстава „Како што сакате/ Ноќ спроти Водици“, во режија на Срѓан Јанаќијевиќ. Претставата ќе започне во 20:00 часот.
Во Програмата за одбележување на Општинскиот празник, ќе учествува и Друштвото на ликовни уметници од Гевгелија со одржување годишна изложба во уметничката галерија „Амам“. Организацијата е на Музеј – Гевгелија, а отворањето на изложбата ќе биде во 20:00 часот.
Следниот ден, на самиот празник (7 ноември, 2024 година), ќе се полага цвеќе пред спомен-обележјата во Гевгелија, во 11:00 часот. пред платото на Народниот театар, а во 12:00 часот, следи традиционално училишно дефиле.
Свечената седница на Советот на Општина Гевгелија, на којашто ќе бидат доделени и Седмоноемвриските награди, е закажана за 19:00 часот, во големата сала на Народниот театар.
Веднаш потоа, по повод празникот, премиерно ќе биде изведена балетската поставка „Исповед“, во организација на Домот на култура „Македонија“, а во продукција на Национална опера и балет. Кореограф е Саша Ефтимова.
На 8 ноември, 2024 година, во Народниот театар, гевгеличани ќе имаат можност да го проследат концертот на градскиот мешан хор „Гортинија“, почнувајќи во 19:00 часот.
Второто издание на инклузивната трка „Run together” заедно со детските трки од атлетската трка „November run Gevgelija 2024 година“ ќе се одржи на 9 ноември, 2024 година, пред платото „Сава Михајлов“. Инклузивната трка ќе започне од 13:30 часот, а по нив детските трки во повеќе категории, во времетраење од половина час.
На 10 ноември, 2024 година, е атлетската трка „November run Gevgelija“, на 5 и 10 километри во женска и машка конкуренција, во организација на атлетскиот клуб „7 Ноември“ од Гевгелија. Ќе започне од 09:00 часот, исто така, пред платото „Сава Михајлов“. Во 10:30 часот ќе бидат прогласени победниците на четвртото издание на трката „7 Ноември“.
Вечерта, на 10 ноември, 2024 година, во организација на Пионерски дом „Јосип Броз Тито“- Гевгелија, следува „Фолклорен ѓердан“- целовечерен концерт на домашни и странски фолклорни ансамбли и културно-уметнички друштва. Ќе започне од 20:00 часот, во Народниот театар.
Седмоноемвриското чествување ќе заврши на 11 ноември, 2024 година, со Книжевен портрет на авторот на книги за деца, Горјан Петревски, во организација на библиотеката „Гоце Делчев“- Гевгелија, којшто ќе се одржи во Народниот театар, почнувајќи од 19:00 часот. Промотори на книжевниот настан ќе бидат проф. д-р Васил Тоциновски и проф. д-р Јованка Денкова.
Сите културно-уметнички настани се бесплатни.
