Осум стихозбирки во трка за наградата „Антево перо“

Осум стихозбирки се најдоа во потесниот круг за престижната книжевна награда „Антево перо“. Имено, Здружението за зачувување на делото на овој наш поет, есеист, препејувач и публицист, како организатор на меѓународната поетско-културна манифестација „Анте Поповски – Антево перо“, го одржа вториот состанок на жирито за доделување на наградите за необјавени поетски ракописи на македонски јазик.

Жири-комисијата во состав: проф. д-р Весна Мојсова- Чепишевска (претседател), д-р Атина Цветаноска и Жорж Поповски (членови), како поетски книги кои се издвојуваат по својот квалитет, селектираше осум збирки, меѓу кои: Мимоза Рајл – „Кој ги пали сите ѕвезди“, Емељ Туна –„Пу, пу не важи“, Анета Велкоска-Ода – „Каде се пресоблекува непостојаниот збор“, Оливера Андоноска – „Ние сме Ева“, Владо Поповски – „Под некое друго небо“, Владо Јаневски – „Молкозбор“, шифра „Живот во засек“ – „Женопојки, митопојки“ и Кирил Ангелов – „Твоја, таговина“. Редоследот на номинираните е според нивното пристигнување на електронската адреса.

Како што соопштија од Здружението, годинава во потесниот избор за наградата „Антев часовник“, која се доделува со цел откривање и афирмација на нови млади талентирани поети што творат на македонски јазик и е поттик за нивното творештво, стручната комисија ги номинираше следниве пет збирки: Ива Шајноска – „Збирка“, Вероника Димоска – „Омеѓување“, Костадин Узунов – „Гравитација кон Индомина“, Софија Тодороска – „Првото утро на цутарот“ и Николина Савеска – „Патот кон себе“. И во овој случај, редоследот на номинираните е според нивното пристигнување на електронската адреса.

Во следното соопштение, жири-комисијата ќе ги соопшти добитниците на наградите „Антево перо“, „Антев златник“ и „Антев часовник“, кои, традиционално, се доделуваат во чест на македонскиот поетски великан Анте Поповски.