Норвешкиот парламент одобри план за купување артилерија со долг дострел од 1,7 милијарди евра за да се зајакне одвраќањето на Русија од страна на сојузниците на НАТО на Арктикот, каде што двете земји делат граница.
„Ова е оружје што може да стигне далеку зад непријателските линии. Ова е одлучувачко во современото војување“, изјави пред парламентот Петер Фролих, портпаролот на опозициските конзервативци за одбранбена политика, пренесе Ројтерс.
Норвешкиот дневен весник „Афтенпостен“, повикувајќи се на анонимни извори, објави на 24 јануари дека владата го избрала артилерискиот систем „Чунму“ од јужнокорејскиот изведувач „Ханва Аероспејс“, победувајќи го HIMARS на „Локид Мартин“ од САД.
Некои членови на норвешкиот парламент рекоа дека нордиската земја треба да помогне во развојот на европска алтернатива на ракетите, но владини претставници задолжени за изборот ја отфрлија идејата како премногу долготрајна и скапа.
Јужнокорејскиот систем ги исполнуваше сите барања на Норвешка за копнена артилерија, вклучително и можноста за испукување ракети на дострел до 500 км, и имаше најбрзо време на испорака, според извештај во „Афтенпостен“.
Министерството соопшти дека планира да набави 16 лансери заедно со неоткриен број ракети за вкупна цена од 19,5 милијарди круни, што е еквивалентно на 1,7 милијарди евра.
„Ханва Аероспејс“ минатата година потпиша договор со полската одбранбена компанија „ВБ Електроникс“ за формирање заедничко вложување за производство на ракети во Полска, вклучувајќи ја и ракетната артилерија „Чунму“, со што ќе се обезбеди производство на европско тло.
