Унгарскиот премиер Виктор Орбан му рече на украинскиот претседател дека земјите-членки ги поставуваат условите за новите земји да се приклучат кон ЕУ, а не земјите-кандидатки.
„Претседателе, вие сте на погрешен пат. Пристапувањето кон ЕУ е процес базиран на заслуги. Земјите-членки ги поставуваат условите, а не земјите-кандидатки“, рече Орбан во објава до Володимир Зеленски.
Зеленски претходно рече дека „важно е Украина да направи сè за да биде технички подготвена за пристапување кон ЕУ до 2027 година. Барем ќе ги завршиме главните чекори“. Тој додаде дека Украина „сака точен датум“ бидејќи, ако нема датум, Русија ќе ја искористи ситуацијата.
Во друга објава, Орбан рече дека верува оти пристапувањето на Украина кон Европа би донело војна.
„Зеленски отворено бара членство во ЕУ до 2027 година и го третира тоа како гаранција за воена безбедност, додека украинските воени лидери упатуваат остри закани до Унгарија. Пристапувањето на Украина во ЕУ нема да донесе мир, туку војна во Европа“, истакна Орбан.
„Унгарија нема да финансира, вооружува или легитимира закана за сопствената безбедност“, рече тој, пренесе „Хина“.
