Унгарија го блокира најновиот пакет санкции на Европската Унија против Русија со цел да изврши притисок врз Европската комисија да го одобри нејзиното барање за заем за одбрана во вредност од 16 милијарди евра. Ова го продолжува конфликтот на премиерот Виктор Орбан со Брисел околу помошта за Украина, тврдат двајца дипломати од ЕУ за Политико.
Односите меѓу Будимпешта и Брисел дополнително се затегнаа откако унгарскиот премиер Виктор Орбан се закани минатиот петок дека ќе стави вето на 20-тиот пакет санкции против Москва, како и на заемот за Украина во износ од 90 милијарди евра. Будимпешта изјави дека поддршката за финансиска помош за Киев може да зависи од повторното воспоставување на протокот на нафта преку цевководот за кој украинските власти велат дека бил оштетен во рускиот напад.
Функционерите на Европската Унија се надеваат дека ветувањето за поправка на цевководот може да го убеди Орбан да се откаже од замрзнувањето на заемот. Сепак, според двајца дипломати од ЕУ запознаени со преговорите, Будимпешта би можела да продолжи да ги блокира санкциите сè додека не се одобри нејзиното барање за заем за одбрана.
На 6 февруари, Комисијата предложи нов пакет санкции, со кој се прошируваат ограничувањата за руската енергија, банки, стоки и услуги. ЕУ се надеваше дека ќе добие конечно одобрение за двете мерки – пакет санкции, за кои е потребна едногласност, и заем од 90 милијарди евра – пред четвртата годишнина од рускиот напад врз Украина, што беше одбележана на 24 февруари.
Иако Киев ќе остане без пари во април, истиот месец кога Унгарците ќе излезат на гласање на национални избори, лидерите на ЕУ се обидуваат да најдат начини да ја убедат Будимпешта да се откаже од своето противење, избегнувајќи правна битка со Орбан што би можела да влијае на неговата кампања за реизбор.
Унгарија аплицираше за 16 милијарди евра преку програмата EU SAFE, која им обезбедува евтини пари на земјите од ЕУ кои купуваат оружје на големо за да ја зајакнат одбраната на блокот од руска агресија.
