Орбан ја распоредува војската: Конфликтот со Украина штотуку драстично ескалира, потребна е засилена заштита на критична енергетска инфраструктура

Орбан ги обвини европските лидери дека го поддржуваат продолжувањето на војната во Украина, што, според него, го продлабочува уништувањето и ризикот од поширок конфликт во Европа.

Унгарскиот премиер Виктор Орбан денес, по седницата на Унгарскиот совет за одбрана, објави дека наредил зголемена заштита на критичната енергетска инфраструктура поради, како што изјави, политички мотивирана блокада на испораките на нафта од Украина, тврдејќи дека Киев подготвува дополнителни акции насочени кон нарушување на работењето на унгарскиот енергетски систем, пренесе „Хина“.

Како што прецизираше, зголемената заштита вклучува распоредување војници и потребна опрема за одбивање на евентуални напади во близина на приоритетни енергетски објекти, додека полицијата ќе ги зголеми патролите околу одредени електрани, дистрибутивни станици и контролни центри.

Орбан, според унгарскиот весник „Маџар Немзет“, во видео порака објавена на социјалните мрежи потсети дека од 27 јануари нафтата не пристигнува во Унгарија преку нафтоводот „Дружба“.

– Податоците јасно покажуваат дека овој неоправдан преседан има политички причини и дека украинската влада врши притисок врз Унгарија и Словачка со блокирање на нафтата – рече Орбан.

Унгарскиот премиер, исто така, изјави дека на седницата ги слушнал извештаите од службите за национална безбедност, врз основа на кои е заклучено дека Украина се подготвува за нови акции насочени кон нарушување на функционирањето на унгарскиот енергетски систем.

– Унгарија не може да биде уценувана! – нагласи Орбан на крајот од своето обраќање.