Европските политичари се плашат да признаат дека конфликтот во Украина е изгубен, бидејќи тоа би предизвикало „земјотрес“ во европската политика и би довело до оставка на оние кои не дозволија конфликтот да заврши порано, изјави унгарскиот премиер Виктор Орбан, пренесува РИА Новости.
„Признавањето дека оваа војна е изгубена и дека нема да продолжиме би предизвикало фундаментален политички земјотрес и промени во европската политика. И тие сè уште не ја достигнале точката каде што ќе бидат принудени да го признаат тоа. Но, тоа ќе се случи, исто како што се случи со миграцијата“, рече Орбан, зборувајќи во градот „Њиредхаза“.
Дополнително, премиерот на Унгарија во интервју за „Велт ам Зонтаг“ изјави дека Украина треба да продолжи да постои како „тампон-држава“ меѓу Русија и НАТО.
„Единственото можно долгорочно решение е повоениот поредок да се базира на фундаменталниот принцип според кој Украина станува тампон-држава каква што беше некогаш. Русија ја задржува територијата што е договорена на меѓународната мировна конференција, а сè западно од таа линија – до источната граница на НАТО – ја сочинува територијата на украинската држава, која повторно станува тампон-зона“, нагласи Орбан.
Според него, Русија и НАТО треба да се договорат за бројот и опремата на украинските вооружени сили на кои ќе им биде дозволено да дејствуваат во тампон-зоната. Двете страни мора да дадат гаранции дека „никој нема да ја потчини таа тампон-држава на нивниот авторитет“.
„Тоа е прашање на преговори. Меѓународното право ги обезбедува инструментите за воспоставување таков систем на гаранции“, истакна унгарскиот премиер.
