Градоначалникот на Општина Илинден, Александар Георгиевски, и компанијата „Панекс експо“ ДООЕЛ, и годинава потпишаа меморандум за соработка, со кој официјално се потврдува организацијата на „Експо Илинден 2026 “– вториот регионален економски саем кој ќе се одржи во општина Илинден.
Целта на саемот е понатамошно зајакнување на локалниот економски развој преку поврзување на бизнис-заедницата, претприемачите, инвеститорите и другите релевантни чинители.
– „Експо Илинден 2026“ повторно ќе биде платформа за промоција на домашните компании, размена на идеи, воспоставување нови партнерства и отворање можности за пораст и инвестиции – соопштија од Општина Илинден.
Градоначалникот на општина Илинден, Александар Георгиевски, истакна дека континуитетот на ваквите настани е од исклучително значење за локалната економија и дека Општина Илинден и понатаму ќе биде активен партнер во иницијативи кои придонесуваат за одржлив развој и за поквалитетен живот за граѓаните.
Организацијата на саемот вторпат е показател за позитивните резултати од првото издание, како и за континуираниот економски напредок на Општина Илинден. Општината, како покровител на настанот, уште еднаш ја потврдува својата заложба за поддршка и унапредување на економскиот и бизнис сектор.
