Oпштината ќе располага со 1,45 милијарди денари

Општината Ѓорче Петров наредната година ќе располага со 1,45 милијарди денари. Советот вчера даде зелено светло на буцетот за 2026 година, кој според општинските власти претставува реален, одговорен и развоен финансиски план, насочен кон подобрување на квалитетот на живот на граѓаните и забрзување на локалниот развој.

Инаку,  речиси 60% од буџетот се наменети за капитални расходи – јасен показател за определбата средствата да се вложуваат во трајни и видливи проекти.

-За капитални инвестиции се издвоени над 596 милиони денари, кои ќе бидат насочени кон: реконструкција и изградба на локални улици и инфраструктура, изградба и унапредување на детски градинки, значајни инвестиции во образованието, подобрување на јавната инфраструктура и осветлување, развој на спортот и рекреацијата. Образованието останува еден од клучните приоритети, со значителни капитални и тековни вложувања во училишната инфраструктура, подобри услови за учениците и поддршка на наставниот кадар –  соопштија од Општина Ѓорче Петров.

Оттаму до даваат дека буџетот предвидува и зголемена поддршка за граѓаните преку субвенции, социјални мерки и трансфери, како и средства за поттикнување на локалниот економски развој.

-Буџетот за 2026 година е балансиран и одржлив, изработен со строга финансиска дисциплина и јасна визија за развој на општината. Секој денар е планиран со цел да донесе конкретен резултат и долгорочна корист за заедницата – децидни се од Општина Ѓорче Петров.