Општина Центар за 6 месеци издала 24 одобренија за нови градби, а не 64 како што во јавноста се говори. Оттаму потенцираат дека оваа информација е целосно неточна и претставува груба манипулација со јавноста. При тоа, додаваат дека тврдењата оти Општината ги потпишувала сите можни дозволи во предизборен период се целосно неосновани.
– Ве информираме, дека во последните шест месеци општината има издадено 24 одобренија за нови градби, додека пак, останатите барања се за реконструкција и адаптација на постојни градби. За половина од издадените одобренија за градба постапката е започната минатата година – посочуваат од локалната самоуправа.
Од Општина Центар апелираат, во иднина, сите заинтересирани страни да се обратат директно до Општината, каде што надлежните служби стојат на располагање за навремено, точно и целосно информирање по сите релевантни прашања.
Тоа дека Општина Центар издала 64 градежни дозволи за само 6 месеци неодамна го објавија од „Шанса за Центар“, нагласувајќи дека тоа е сторено според планови донесени во 2012 година.
