Најмалку 68 африкански мигранти загинаа, а 74 се водат како исчезнати по бродолом покрај брегот на Јемен, соопшти во понеделник агенцијата за миграција на Обединетите нации.
Африканските мигранти бегаат од сиромаштијата и војната во своите земји со бродови, барајќи подобро утре во богатите арапски земји од Заливот. Бродоломите се чести.
Бродот што потона во Аденскиот Залив во неделата превезуваше 154 етиопски мигранти. Трагедијата се случи покрај брегот на јужната јеменска покраина Абјан, изјави за АП Абдусатор Есоев, локалниот раководител на Меѓународната организација за миграција (ИОМ).
Тој рече дека телата на 54 мигранти се исфрлиле на брегот во округот Канфар. Уште 14 тела се пронајдени во областа Зинџибар, главниот град на покраината Абјан.
Само 12 од мигрантите го преживеале бродоломот, а останатите се претпоставува дека се мртви, рече Есоев.
Службениците на Абјан изјавија дека е во тек голема операција за пребарување и спасување на мигрантите, при што многу тела се расфрлани по должината на голем дел од крајбрежјето.
Мигрантите од Источна Африка и Африканскиот Рог го преминуваат Црвеното Море или Аденскиот Залив во преоптоварени чамци со помош на шверцери на луѓе. Тие пристигнуваат во Јемен како прва странска станица на шверцерскиот пат, и покрај долготрајната граѓанска војна таму.
Околу 60.000 мигранти пристигнаа во Јемен минатата година, според ИОМ.
