Кенискиот атлетичар Бенард Кибет Коеч, кој заврши петти на трката на 10.000 метри на Олимписките игри во Париз, е привремено суспендиран поради допинг, објави Одделот за интегритет на атлетските спортови (АИУ).
- АИУ привремено го суспендираше Бенард Кибет Коеч (Кенија) поради употреба на забранета супстанца, соопшти антидопинг-телото во соопштение на социјалните мрежи, објаснувајќи дека случајот се однесува на неправилности во биолошкиот пасош на спортистот.
Биолошкиот пасош претставува долгорочно следење на одбрани биолошки параметри на спортистите, овозможувајќи им на надлежните органи да спроведуваат контроли, а во одредени случаи, исто така, овозможува изрекување санкции дури и без позитивен допинг тест, доколку експертски панел донесе едногласна одлука за неправилности.
Освен што беше петти во Париз, Коеч го освои петтото место и на 10.000 метри на Светското првенство во Будимпешта во 2023 година, а е и сопственик на најдобриот резултат на сите времиња на растојанието од 10 милји (44:04), кое не е на олимписката програма.
