Околу 200 мигранти ослободени од таен затвор во Либија: Пронајдовме едно од најлошите злосторства против човештвото

Повеќе од 200 мигранти се ослободени од „таен затвор“ во либискиот град Куфра каде што биле држени во нехумани услови, објавува „Бета“.

Два извори на Ројтерс во либиските безбедносни структури изјавија дека властите откриле подземен затвор, длабок речиси три метри, за кој велат дека го водел либиски шверцер на луѓе.

Еден од изворите рече дека лицето сè уште не е уапсено.

„Некои од ослободените мигранти биле држени во подземни ќелии до две години“, рече изворот.

Друг извор рече дека она што било откриено за време на операцијата е „едно од најлошите злосторства против човештвото откриени во регионот“.

„Операцијата резултираше со рација на таен затвор во градот, каде што беа откриени неколку нехумани подземни ќелии за притвор“, додаде еден од изворите.

Ослободените мигранти се од Субсахарска Африка, главно Сомалија и Еритреја, а меѓу нив има и жени и деца, велат изворите.

Куфра се наоѓа на истокот од земјата, на околу 1.700 километри од Триполи.

Од соборувањето на Моамер Гадафи во востанието поддржано од НАТО во 2011 година, Либија стана транзитна рута за мигрантите кои бегаат од конфликти и сиромаштија кон Европа, користејќи опасни патишта низ пустината и Средоземното Море.

Економијата базирана на нафта во Либија, исто така, привлекува осиромашени мигранти кои бараат работа, но безбедносната состојба во земјата е лоша, што ги прави мигрантите особено ранливи на злоупотреба.

Најмалку 21 тело на мигранти беа пронајдени во масовна гробница во источна Либија минатата недела, а до 10 преживеани од групата покажаа знаци на тортура пред да бидат ослободени од заробеништво, изјавија два безбедносни извори за Ројтерс.

Главниот обвинител на Либија во петокот изјави дека властите во источниот дел од земјата упатиле еден обвинет на суд во врска со масовната гробница, под обвинение за „сторење сериозни кршења на правата на мигрантите“.

Во февруари минатата година, 39 тела на мигранти беа пронајдени од околу 55 масовни гробници во Куфра. Градот е исто така дом на десетици илјади судански бегалци кои избегаа од конфликтот што избувна во Судан во 2023 година.