Одобрен спектакуларен проект од 13,5 милијарди евра: Италија ќе ја спои Сицилија со копно!

Италијанската влада во среда даде конечно одобрение за изградба на најдолгиот мост во светот со еден распон што ќе ја поврзе Сицилија со копното, и покрај еколошките, финансиските и други загрижености што ја одложуваа одлуката со децении.

Структурата долга 3,7 км е предмет на дискусија од крајот на 1960-тите како начин за поттикнување на развојот на сиромашниот југ на Италија.

Десничарската влада на сегашната премиерка Џорџа Мелони го приоритизираше проектот и издвои 13,5 милијарди евра во следните 10 години за изградба на мостот и околните објекти. Месинскиот теснец ја одделува копнена Италија од Сицилија. Според Messina Strait Company, мостот ќе биде завршен во 2032 година.

На проектот силно му се спротивставуваат експертите кои ја доведуваат во прашање неговата изградба, со оглед на тоа што би се градел во зона на потреси. Многумина се плашат од пречекорување на трошоците, можна штета на животната средина и инфилтрација на договорите за градежништво од страна на локалната мафија. Некои граѓански групи кои се противат на мостот велат дека е непотребен, а еколошките групи поднесоа жалба до Европската Унија оваа недела, наведувајќи сериозни ризици за локалната животна средина.

И покрај ова, проектот има силна поддршка од оние кои веруваат дека брзата железничка и патна врска, како алтернатива на сегашниот фериботски премин, ќе им обезбеди на Сицилија и другите сиромашни јужноиталијански региони многу потребен стимул и развој.

По меѓународен тендер, проектот му беше доделен на конзорциумот „Еуролинк“, предводен од најголемата италијанска градежна компанија „Вебилд“. Конзорциумот, исто така, ги вклучува и шпанската „Сасир груп“ и јапонската „ИХИ“.

Одборот на Messina Strait Company, која го надгледува проектот, изјави дека одобрението во среда треба да овозможи почеток на прелиминарни работи, вклучувајќи археолошки и геолошки истражувања, а исто така ќе овозможи и експропријација на земјиште.

Webuild  процени дека мостот би можел да создаде повеќе од 100.000 работни места.