Најавената средба меѓу државниот секретар на Соединетите Американски Држави, Марко Рубио, и рускиот министер за надворешни работи, Сергеј Лавров, е одложена, со што се доведува во прашање средбата меѓу претседателите на двете земји, Доналд Трамп и Владимир Путин, објави Си-Ен-Ен.
Средбата меѓу Рубио и Лавров засега е ставена на чекање, изјави извор од Белата куќа за Си-Ен-Ен. Според Си-Ен-Ен, не е јасно зошто средбата нема да се одржи оваа недела, а еден од изворите рече дека Рубио и Лавров имале различни очекувања во врска со можниот крај на војната во Украина.
Исто така, не е јасно какво влијание ќе има одложувањето на средбата Рубио-Лавров врз планираниот самит меѓу Трамп и Путин во Будимпешта.
Засега, Рубио веројатно нема да препорача средбата меѓу Путин и Трамп да се одржи следната недела, иако тој и Лавров може повторно да разговараат оваа недела.
Рубио и Лавров во понеделникот разговараа по телефон за „следните чекори“ во врска со минатонеделниот разговор меѓу Трамп и Путин за можниот крај на конфликтот во Украина.
Заменик-секретарката за печатот на Белата куќа, Ана Кели, за Си-Ен-Ен изјави дека „претседателот Трамп постојано работи на наоѓање мирно и дипломатско решение за да се стави крај на оваа бесмислена војна и да се запре убивањето“.
