Основното јавно обвинителство Кочани му поднесе кривична пријава и на сопственикот на објектот каде што со години нелегално функционирала дискотеката Пулс. Осомничен е како соизвршител за -Тешки дела против општата сигурност од Кривичниот законик, соопштуваат од ОЈО. Објектот каде во пожар загинаа 62 млади луѓе а околу 200 останаа со повреди, претходно бил сервис за автомобили. Во договор со сопственикот на Пулс, газдата на објектот импровизирал со градежни работи и објектот од сервис се пренаменил во кабаре.
„Без да поднесе барање и да добие одобрение за пренамена на објектот од надлежен орган, заеднички и во договор со осомничениот неформален сопственик на правното лице, тој на различни датуми и во повеќе наврати во временскиот период од 2012 година до месец март 2025 година преземал градежни активности со кои извршил и учествувал во незаконска пренамена на објектот од намена Г3 – сервиси и сообраќајна инфраструктура во намена Б3 – големи угостителски единици и овозможил во објектот незаконски да се врши угостителска дејност дискотека/ кабаре“ информираат од ОЈО
Според Правилникот за урбанистичко планирање ,Г3 е наменски објект за сервиси за одржување и поправка на опрема и индустриски производи како што се
сервиси за автомобили и други возила, машини, алати и инструменти, хемиско чистење. Според истрагата дискотеката немала паркинг и пристап во случај на несреќа како што се случи таа на 16 март. Со последното проширување истрагата опфаќа 69 осомничени. (П.А.)
