Од петмина осомничени, најден еден, продавале холандска стока

Од петмина осомничени припадници на криминалната група Грчец, полицијата приведе само еден, а другите се недостапни. Во новата истрага на Обвинителството за организиран криминал и корупција за спречување набавка и растурање дрога, по добро познатиот „дилерски“ канал Холандија – Македонија, осомничените се товарат за неовластено производство и пуштање во промет на наркотични дроги, психотропни супстанции и прекурзори. Доказите што, по пресудата за првата група од кланот Грчец, беа оспорувани од одбраната во текот на судењето, и овој пат се добиени преку скај-комуникацијата, а полицијата извршила претреси на три локации.

– Постои основано сомнение дека осомничените, заедно со други сега починати лица, во два наврата организирале неовластена набавка, пренесување и продажба на шест килограми наркотична дрога  кокаин од Кралството Холандија до Македонија. Наркотичната дрога била наменета за понатамошна неовластена продажба во државава. Осомничените и сега починатите заеднички презеле инкриминирачки активности, дејствувајќи секој во својата улога во делот на неовластената набавка на наркотичната дрога, организирањето на нејзиното пренесување и складирањето на соодветна скриена локација, како и нејзината распределба заради понатамошна неовластена продажба – пишува во информацијата од ОЈОГОКК.

На единствениот уапсен во новата полициска акција за криминалната група од Грчец му е одреден затворски притвор. (П. А).