Обама „распали“ по Трамп: „Хаос, суровост и корупција“ — од Белата куќа стигна остар одговор

Поранешниот американски претседател Барак Обама упати остри критики кон актуелниот претседател Доналд Трамп, обвинувајќи го за корупција, неспособност и лично богатење на сметка на американските граѓани.

Обама се вклучи во предизборната кампања на демократите, настапувајќи на собири во Кливленд и Детроит, во пресрет на изборите за Конгресот закажани за 3 ноември.

На собир во Мичиген, каде што му даде поддршка на демократскиот кандидат за Сенатот, Абдул Ел Сајед, Обама порача дека изборите претставуваат можност да се ограничи моќта на администрацијата на Трамп.

„Мораме да вклучиме осигурувач и да внесеме малку одговорност во оваа влада“, изјави Обама.

Тој го обвини Трамп дека ја користи претседателската функција за лична финансиска корист.

„Никогаш не сме виделе претседател кој толку успешно профитира и се богати на ваша сметка“, порача поранешниот американски лидер.

Обама ја критикуваше и политиката на администрацијата кон Иран, исмевајќи ги тврдењата за американска победа. Според него, случувањата му овозможиле на Иран поголемо влијание врз транспортот на нафта низ Ормускиот Теснец.

Особено внимание привлече неговиот коментар за преуредувањето на Белата куќа, кое го оцени како невкусно.

„Поради него Белата куќа изгледа како Садам Хусеин да отворил ресторан ‘Cheesecake Factory’“, изјави Обама, предизвикувајќи реакции кај присутните.

Тој саркастично го критикуваше и министерот за одбрана Пит Хегсет, обвинувајќи ја администрацијата дека се занимава со споредни прашања наместо со вистинските проблеми на државата.

Според анкета на „Ројтерс“ и „Ипсос“ од август, 63 проценти од испитаниците сметаат дека Трамп и неговото семејство несоодветно профитирале од криптовалути, додека 69 проценти веруваат дека неговите приватни деловни интереси влијаат врз политичките одлуки.

Трамп не чекаше долго за да одговори.

На платформата за социјални медиуми „Truth Social“, тој упати остар напад врз Обама, конкретно во однос на неговата политика кон Иран.

„Обама беше целосно неспособен претседател! Тој му плати милијарди долари на Иран и му го отвори патот кон нуклеарно оружје“, изјави Трамп.

Американскиот претседател, исто така, укажа на поддршката што Обама им ја даваше на демократските кандидати на претходните претседателски избори.

Трамп истакна дека Обама силно ја поддржувал Хилари Клинтон, која ги загуби изборите, а потоа и Камала Харис, која исто така беше поразена.

Со тоа, Трамп се обиде да го намали политичкото влијание на поранешниот претседател, кој неодамна повторно активно се вклучи во кампањата на демократите.