Новото осветлување ги откри старите дупки на асфалтот      

Скопјани се жалат дека надвозникот кај Автокоманда, кој скопскиот градоначалник го осветли, заедно со оној кај Бит- пазар – „Дијамант“, е небезбеден, бидејќи коловозот е со огромни дупки, кои ги нарекуваат кратери. Објавувајќи фотографии на социјалните мрежи, тие реагираат дека дупките на овој надвозник стојат со години и бараат да бидат санирани, бидејќи, како што велат, ги искршиле автомобилите.

– Дупки колку што сакаш! Оградата на мостот скапана. Ама важно ЛЕД-светло има – коментираат скопјани.

Од Град Скопје одговорија дека преку своето јавно претпријатие „Улици и патишта“ континуирано работат на одржување и поправка на урбаната сообраќајна инфраструктура, вклучително и санација на ударните дупки, одржување на коловозните ленти и помали интервенции за безбедност на сообраќајот и оти подготвуваат документација за реконструкција и унапредување на инфраструктурата, вклучително и на надвозниците

Скопјани се жалат дека надвозникот кај Автокоманда, кој скопскиот градоначалник го осветли, заедно со оној кај Бит-пазар – „Дијамант“, е небезбеден, бидејќи коловозот е со огромни дупки, кои ги нарекуваат кратери.

Објавувајќи фотографии на социјалните мрежи, тие реагираат дека дупките на овој надвозник стојат со години и бараат да бидат санирани, бидејќи, како што велат, ги искршиле автомобилите.  

Некои граѓани коментираат дека овие дупки се од шлеперите што минуваат оттука секојдневно, кон Царината, „Фершпед“, „Цементарница Усје“, но и од други транспортни камиони и автомобили, што, како што потенцираат, е уште еден показател дека треба да се забрани нивно движење по надвозникот.

Освен тоа, забележуваат и тоа дека е скапана и оградата на надвозникот.

– Дупки колку што сакаш! Оградата на мостот скапана. Ама важно лед светло има – коментираат скопјани.

Градоначалникот на Град Скопје, Орце Ѓорѓиевски, на средината од јануари обелодени дека се осветлени надвозниците „Дијамант“ и  „Маџари“, нарекувајќи ги клучни точки на градот.

Тој тогаш потенцираше дека со оваа интервенција, покрај зголемената безбедност, се обезбедува и поуреден, модерен и естетски изглед, достоен за градот што ги пречекува своите граѓани и посетители.

– Со истата посветеност продолжуваме и во иднина, систематски да ги уредуваме и осветлуваме сите мостови и надвозници во Скопје, создавајќи побезбедна сообраќајна инфраструктура и поквалитетен урбан амбиент – изјави тогаш скопскиот градоначалник.

Но, очигледно, светлата ги открија другите недостатоци.

За тоа дали е планирана интервенција на надвозникот кај Автокоманда, но и на другите, од Град Скопје  одговорија дека преку своето јавно претпријатие „Улици и патишта“ континуирано работат на одржување и поправка на урбаната сообраќајна инфраструктура, вклучително и санација на ударните дупки, одржување на коловозните ленти и помали интервенции за безбедност во сообраќајот.

– Град Скопје подготвува документација за реконструкција и унапредување на инфраструктурата, вклучително и на надвозниците – тврдат градските власти.

Во однос на осветлувањето, од Град Скопје велат дека иако се осветлени надвозниците и другите сообраќајни точки, што е важен сегмент во безбедноста и е дел од системското одржување, сообраќајната сигнализација и другите елементи се одржуваат и коригираат постојано, едно со друго, соодветно на потребите. 

(А. П.)