Ново пукање во САД, повредени две лица во Портланд: „Имиграциската машина на Трамп користи насилство“

Американските федерални агенти застрелаа две лица пред болница во Портланд, Орегон, еден ден откако жена беше застрелана од агент на Службата за имиграција и царина (ICE) во Минеаполис.

Полициската управа на Портланд (PPD) во четврток попладне соопшти дека две лица се однесени во болница по инцидент со пукање во кој учествувале федерални агенти, пренесе Гардијан.

Полицијата првично реагираше на пријава за пукање пред кампусот на болницата Адвентисти во Источен Портланд, пред да дознае дека „маж кој бил повреден повикувал помош“ на околу 3 милји оддалеченост.

„Полициските службеници реагираа и пронајдоа маж и жена со очигледни прострелни рани. Пациентите беа однесени во болница“, се вели во полициското соопштение.

Максин Декстер, демократска претставничка од округот каде што се случи пукањето и самата докторка, рече дека двајцата повредени лица „се живи, но не знаеме какви се повредите“.

Таа, исто така, ја повика Службата за имиграција и царина на САД (ICE) да го напушти градот.

„ICE не направи ништо друго освен што донесе терор, хаос и суровост во нашите заедници“, рече Декстер.

„Имиграциската машина на Трамп користи насилство за да ги контролира нашите заедници – директно од авторитарен прирачник. ICE мора веднаш да ги прекине сите активни операции во Портланд.“

DEVELOPING: Local and federal sources tell ABC News that federal agents shot two people in Portland, Oregon, on Thursday afternoon. The FBI is responding.

The sources say the agents who opened fire are with U.S. Customs and Border Protection. pic.twitter.com/9LrQbU4enE

— ABC News (@ABC) January 8, 2026

Во меѓувреме, демонстрантите во Минеаполис поставија импровизирани барикади, блокирајќи го пристапот на возилата до раскрсницата најблиску до местото каде што агент на ICE застрелал и убил 37-годишна жена од Минеаполис во среда, јавува репортер на CNN на местото на настанот.

Барикадите – направени од дрвени штици, столчиња и опрема за контрола на сообраќајот – имаат знак на кој пишува „Зона без ICE“ и мал оган запален зад нив.

Додека Министерството за внатрешна безбедност вели дека Рене Никол Гуд била „насилна“ и се обидела да ги прегази агентите, градоначалникот на Минеаполис, Џејкоб Фреј, рече дека тоа е „неодговорна употреба на сила“.