Новите возила треба да се направени со минимум 20 % рециклирана пластика  

Во 2023 година, во ЕУ биле произведени 14,8 милиони моторни возила, а биле регистрирани 12,4 милиони. На патиштата во ЕУ има 285,6 милиони моторни возила и секоја година околу 6,5 милиони доаѓаат до крајот на својот животен век.

Со цел Европа да не стане депонија на стари возила, пред една недела, европратениците усвоија предлози за нови правила на ЕУ за циркуларност, кои ќе го опфатат целиот животен циклус на возилата, од дизајнот до конечниот третман на крајот од животниот век.

Се очекува нацрт-мерките да го поттикнат преминот на автомобилскиот сектор кон циркуларна економија преку намалување на влијанието врз животната средина поврзано со производството и со третманот на возилата на крајот од животниот век, како и зајакнување на одржливоста на индустријата за рециклирање автомобили во Европа.

Ќе важат специфични правила за сите возила, освен за возилата за специјална намена, возилата дизајнирани и изградени за употреба од страна на вооружените сили, цивилната одбрана, противпожарните служби, службите за итна медицинска помош и возилата од историски и посебен културен интерес.

Новите возила треба да бидат дизајнирани така што ќе овозможат лесно отстранување на што е можно повеќе делови и компоненти од страна на овластени капацитети за третман, со цел нивна замена, повторна употреба, рециклирање, преработка или реновирање, каде што е технички можно.

Пратениците сакаат пластиката што се користи во секој нов тип возило да содржи минимум 20 % рециклирана пластика во рок од шест години од стапувањето во сила на правилата. Тие, исто така, сакаат производителите да ја исполнат целта од најмалку 25 % во рок од 10 години од стапувањето во сила, доколку е достапна доволно рециклирана пластика по непретерани цени. Тие, исто така, сакаат Комисијата да воведе цели за рециклирани челик и алуминиум и за нивните легури откако ќе се направи студија за изводливост.

Три години по стапувањето во сила на новите правила, производителите ќе мора да ги покријат трошоците за собирање и третман на возилата што ја достигнале фазата на својот крај на животниот век.

Од оваа година важи и новото правило на ЕУ за повеќе рециклирана пластика, односно шишињата изработени од ПЕТ-пластика да содржат најмалку 25 % рециклиран материјал, а до 2030 година процентот на рециклирана пластика во шишињата треба да се зголеми на 30 %. Иако ова може да влијае на бојата на шишињата (со можни посиви или пожолтени нијанси), нивните безбедност, хигиенска исправност и издржливост остануваат гарантирани. Производителите ќе мора да ги приспособат своите процеси и технологии за да ги исполнат новите стандарди без да ја загрозат безбедноста на храната или трајноста на производите.