Русија се надева дека ќе ги реши прашањата околу нафтеното ембарго на САД против Куба преку конструктивен дијалог со САД, изјави портпаролот на Кремљ, Дмитриј Песков.
Песков рече дека Русија не сака нејзината помош за Куба да предизвика дополнителни американски царини и да доведе до понатамошна ескалација, иако моменталната трговија меѓу Русија и САД е на нула.
Руските медиуми објавија во четврток дека Русија наскоро ќе испорача пратка сурова нафта и гориво на Куба како хуманитарна помош, повикувајќи се на руската амбасада во Куба.
Американскиот претседател Доналд Трамп потпиша извршна наредба на 29 јануари со која се заканува дека ќе воведе царини за стоки извезени во САД од земјите што ја снабдуваат Куба. Кубанските владини претставници објавија низа мерки на 6 март, вклучително и ограничувања за купување гориво, како одговор на новата рунда нафтена блокада од страна на САД, пренесе Ксинхуа.
