Матичната компанија на „Pornhub“, „Aylo“, апелираше до „Apple“, „Google“ и „Microsoft“ да воведат проверка на возраста директно на уредите, со цел да се обезбеди поефикасна заштита на малолетниците и да се намали ризикот за приватноста на корисниците.
Aylo тврди дека сегашниот систем, во кој страниците за возрасни поединечно ја проверуваат возраста на посетителите, не е доволно сигурен или безбеден. Наместо тоа, се предлага модел во кој корисникот би бил потврден еднаш на својот телефон или компјутер, додека апликациите и страниците потоа би добивале потврда дека корисникот има над 18 години преку посебен API.
Компанијата вели дека сегашните методи за верификација честопати бараат чувствителни податоци како што се лични документи или биометрија, додека системот за „верификација на уредот“ значително би го намалил собирањето на такви информации.
Апелот доаѓа откако новите закони за верификација на возраста во САД и Велика Британија доведоа до пад на сообраќајот и посетите на „Pornhub“ до 80% во одредени региони. „Aylo“ конкретно го посочува Законот за обезбедување дигитална возраст на Калифорнија како пример за решение што ја префрла одговорноста на продавниците за апликации.
Pornhub нагласува дека целта е секој нов уред да биде „безбеден за малолетници“ по дифолт, а содржината за возрасни да се отклучува само по доказ за возраст.
Технолошките гиганти засега се претпазливи. Google вели дека веќе развива алатки за заштита на децата, но верува дека платформите за возрасни треба да имплементираат и дополнителни мерки. Microsoft истакнува дека е клучно да се имплементира верификација на возраста на ниво на услуга, со јасни опции за родителска контрола.
Прашањето за верификација на возраста станува сè порелевантно и во Европа, каде што се разгледува воведувањето на построги обврски за платформите со експлицитна содржина.
