Ноќен грабеж на банка во Германија – проценката на штетата може да достигне милиони, вознемиреност кај корисниците

Непознати крадци го пробиле ѕидот на трезорот во филијалата на банката Шпаркасе во Гелзенкирхен во германската сојузна покраина Северна Рајна-Вестфалија во текот на ноќта, објави германската полиција.

Напаѓачите наводно ги пребарале сефовите, а вредноста на украдените предмети сè уште не е позната, објавува „Тагешау“.

Според полицискиот извештај, крадците влегле во банката преку подземна гаража на третото ниво и користеле дупчалка за да го пробијат армирано-бетонскиот ѕид до трезорот. Банката е опремена со аларми и видео надзор, а проценката на штетата, според првичните информации, може да достигне милиони.

Форензичките експерти го напуштиле трезорот околу 16 часот, а вработените во банката ќе утврдат во текот на денот кои од 3.330 сефови се ограбени и ќе ги информираат клиентите по телефон или е-пошта почнувајќи од утре.

Грабежот бил откриен рано утрово кога бил активиран противпожарниот аларм, а сторителите успеале да избегаат. Полицијата го истражува случајот и апелира до сведоците да пријават какви било сомнителни звуци или настани во близина на банката во изминатите неколку дена.

Клиентите на банките изразија загриженост бидејќи сè уште нема информации дали нивните сефови се украдени, а некои пријавија дека во сефовите складирале имот во вредност од неколку стотици илјади евра, пренесе „Танјуг“.