Никому не му е грижа ако те удри камен од карпа, сам ќе си ги сносиш последиците

Изземајќи се од надлежноста за санирање на состојбата со кањонот Матка, од Град Скопје упатија на Центарот за управување со кризи (ЦУК), како надлежна институција за процена и координација при ризици и опасности од ваков тип.

Директорот на ЦУК, Мухамед Али, за весникот ВЕЧЕР информираше дека веќе биле преземени соодветни мерки и активности согласно со Законот за управување со кризи, во согласност со членовите 4 и 5, а во врска со членот 37 од Законот за управување со кризи.

– Одржани се координативни состаноци со претставници на релевантни институции, известени се надлежните субјекти, по насоки на Генералниот секретаријат, одржана е седница и на органи и на тела на Владата за актуелната состојба, донесени се соодветни препораки и заклучоци во однос на проблемот со одроните во Матка и по нив се постапува – истакна Али.

Тој повтори дека Општината Сарај ги информирала жителите, локалните и странските туристи, како и сите здруженија кои планираат активности во оваа област, дека врз основа на одлуката на Дирекцијата за заштита и спасување (57-2071-1 од 19.02.2026 година), треба да се внимава при движењето по патеката на Матка поради ризик од одрон на камења и тоа дека ДЗС поставила и знаци што означуваат одрон на камења во опасните подрачја.

– Предупредувањето стапи во сила веднаш и ќе трае до понатамошно санирање на состојбите – нагласи Али.

Инаку, во петокот, весникот ВЕЧЕР пишуваше дека одроните од карпи претставуваат опасност за посетителите на кањонот Матка. Прашани за тоа дали и што ќе преземат за санирање на состојбата, и од Општина Сарај и од Град Скопје, како и од Дирекцијата за заштита и спасување, се изземаа од одговорноста, а во меѓувреме, посетителите на кањонот самите ќе си го сносат ризикот доколку, не дај боже, се случи нешто, онака како што и, всушност, е наведено и во предупредувањето од Општина Сарај за опасноста од одрони од карпи.

(А. П.)