Унгарскиот премиер Виктор Орбан изјави дека одобрувањето на членството на Украина во Европската Унија директно би ја одвело ЕУ во војна со Русија, нагласувајќи дека Будимпешта нема да го поддржи влезот на Киев во блокот.
– Влезот на Украина во ЕУ би значел само едно – војната би стигнала до Европа, а унгарските пари би завршиле во Украина – напиша Орбан во објава на социјалните мрежи.
Украинскиот претседател Володимир Зеленски претходно изјави за Euronews дека „Орбан мора да понуди нешто на Украина, што ја штити цела Европа од Русија“, додавајќи дека „дури и сега, за време на војната, Будимпешта не дава никаква поддршка“.
Зеленски ја обвини Унгарија дека дава „специфична поддршка на Москва“ со блокирање на членството на Украина во ЕУ.
– Морам да ја отфрлам сугестијата дека Унгарија ѝ должи нешто на Украина. Украина не ја брани Унгарија од никого или од ништо. Ние не сме го побарале ова и никогаш нема да го направиме – рече унгарскиот премиер.
Тој додаде дека безбедноста на Унгарија е загарантирана од нејзината армија и членството во НАТО, „од кое Украина, за среќа, не е дел“.
За разлика од повеќето земји-членки, Унгарија одржува неутрална позиција кон конфликтот во Украина, одбивајќи да испрати оружје во Киев и повикувајќи на дипломатско решение на кризата.
Орбан потсети дека Будимпешта веќе ѝ обезбедила на Украина 200 милиони евра хуманитарна помош и оцени дека би било „жалосно ако ова не значи ништо за Зеленски“.
Украина доби статус на кандидат за членство во ЕУ во 2022 година, но Орбан јасно стави до знаење дека Унгарија ќе стави вето на приемот на Киев во блокот.
На референдумот одржан во јуни оваа година, дури 95 проценти од Унгарците гласаа против членството на Украина во Европската Унија.
