Бенјамин Нетанјаху ја потврди елиминацијата на шефот на разузнавачката служба на Револуционерната гарда, Мохамед Каземи, и неговиот заменик, генерал Хасан Мохакик, објавува „Тајмс оф Израел“.
– Можам да ви кажам пред малку дека ги елиминиравме нивниот шеф на разузнавањето и неговиот заменик во Техеран – му рече тој на водителот на „Фокс њуз“, Брет Бејер.
Нетанјаху денес изјави дека започнал воздушни напади врз Иран за да спречи „нуклеарен холокауст“.
„Моравме да дејствуваме. Беше последен момент и дејствувавме. Да се спасиме себеси, но и… да го заштитиме светот од овој запалив режим. Не можеме да дозволиме најопасниот режим во светот да го има најопасното оружје во светот… Нема да имаме уште еден холокауст, нуклеарен холокауст. Го имавме и претходно, во минатиот век, еврејската држава нема да дозволи да се изврши холокауст врз еврејскиот народ. Тоа нема да се случи“, изјави тој за „Фокс њуз“.
Тој рече дека неговата влада има разузнавачки информации дека Иран е на неколку месеци од развој на почетно нуклеарно оружје.
„Разузнавачките информации што ги добивме и ги споделивме со Соединетите Држави беа апсолутно јасни: дека тие работат на таен план за вооружување на ураниум, дека се движат многу брзо, дека ќе имаат тест уред, а можеби и почетен уред, во рок од неколку месеци, а секако помалку од една година. Ова е нешто што не можеме никако да го прифатиме“, рече Нетанјаху.
Тој тврдеше дека „Иран има доволно збогатен ураниум за девет бомби“.
„Сè што требаше да направат беше да ги вооружат. Ние го спречивме тоа“, рече израелскиот премиер.
Тој, исто така, го обвини Иран дека развива планови за испорака на нуклеарно оружје на Хутите во Јемен и дека Израел и САД се „целосно координирани“.
„Јас сум во постојан контакт со претседателот (САД Доналд) Трамп. Се познаваме многу години. И очигледно однапред ги информиравме нашите американски пријатели и претседателот Трамп, нашиот голем пријател. Го направивме тоа“, рече Нетанјаху.
Тој го опиша Трамп како „непријател број еден“ за Иран.
„Тој е решителен лидер. Никогаш не го зел патот што го зел другите, обидувајќи се да преговара со нив на слаб начин, давајќи им во основа пат кон збогатување на ураниум, што значи пат до бомба, полнејќи го со милијарди и милијарди долари. Тој го зеде овој лажен договор и во основа го искина. Го уби шефот на ИРГК, Касем Сулејмани“, додаде тој.
На прашањето дали Израел има капацитет да ги уништи иранските објекти длабоко под земја, Нетанјаху рече дека „сигурно е многу направено“.
„Го уништивме главниот објект во Натанц. Тоа е главниот објект за збогатување. И доколку е потребно, ќе додадеме што е потребно. Но да, ние сме посветени на постигнување на обете цели… Не сакам да навлегувам во конкретни оперативни планови“, рече тој, додавајќи дека Иранците биле „целосно изненадени“ од израелската операција.
Тој нагласи дека Израел е подготвен да ја прекине својата кампања ако Иран ги прифати барањата на САД за демонтирање на неговата нуклеарна програма.
„Инаку, ќе заврши кога ќе ги отстраниме овие објекти, а ние ќе го сториме тоа“, предупреди израелскиот премиер.
Тој не сакаше да коментира за информациите објавени од американските медиуми денес дека Трамп ставил вето на израелскиот напад врз иранскиот врховен лидер ајатолахот Али Хамнеи.
„Има толку многу лажни вести за разговори што никогаш не се случиле и нема да навлегувам во тоа. Но, можам да ви кажам, мислам дека го правиме вистинското нешто“, додаде израелскиот премиер.
