Нетанјаху го добива најголемиот ривал пред израелските избори

Поранешниот началник на Генералштабот на израелската армија, Гади Ајзенкот, се појави како еден од главните политички противници на премиерот Бенјамин Нетанјаху пред парламентарните избори на 27 октомври, бидејќи неговата новоформирана партија Јашар забележа раст на поддршката во последните недели.

Ајзенкот, кој влезе во политиката во 2022 година, се обидува да ги собере центристичките и умерените десничарски гласачи кои се незадоволни од владата на Нетанјаху по речиси три години војна и политички поделби во земјата, пишува Политико. Неодамнешните анкети на јавното мислење покажуваат дека Јашар е меѓу водечките партии. Анкета објавена на 13 август ѝ даде на партијата на Ајзенкот четири места пред Ликуд на Нетанјаху, додека други анкети покажаа дека ниту еден од спротивставените политички блокови нема мнозинство од 61 место потребно за формирање влада.

Изборите сè повеќе се оформуваат како натпревар помеѓу Нетанјаху и Ајзенкот, а безбедноста и одбраната се меѓу најважните прашања за израелските гласачи.

Ајзенкот беше началник на Генералштабот на Израелските одбранбени сили од 2015 до 2019 година, а по нападот на Хамас на 7 октомври 2023 година, се приклучи на воениот кабинет на Нетанјаху.

Тој го напушти кабинетот во јуни 2024 година заедно со Бени Ганц, поради критиките дека Нетанјаху нема јасна стратегија за завршување на војната и враќање на заложниците.

Нетанјаху ги засили нападите врз Ајзенкот во последните месеци, обвинувајќи го дека се залага за претерано претпазлив пристап кон воените операции за време на војната. Ајзенкот возврати тврдејќи дека премиерот ја избегнува одговорноста за неуспесите што му претходеа на нападот од 7 октомври и начинот на кој ја водеше земјата по него.

Иако се претставува како алтернатива на Нетанјаху, Ајзенкот зазеде тврд став по безбедносните прашања. Тој се залага за силна израелска војска, но во исто време ги критикува долготрајните воени операции без јасни политички цели.

Претстојните избори ќе бидат првите парламентарни избори во Израел по нападот на Хамас на 7 октомври 2023 година.

Нетанјаху, кој е премиер подолго од кој било друг израелски лидер, се соочува со јавно незадоволство поради безбедносните пропусти, долготрајните војни и одбивањето да преземе лична одговорност за настаните што доведоа до нападот.