„Несовршен договор“ до средина на годината: Објавени сценарија за крајот на војната меѓу Русија и Украина, едната страна губи речиси сѐ

Русија и Украина до средината на годината би можеле да постигнат „несовршен договор“ кој би ја замрзнал војната на терен, но без да склучат сеопфатен мировен договор, се наведува во новиот извештај на геополитичкиот центар на американската банка ЈП Морган Чејс.

Во извештајот на Советодавниот одбор за глобалните предизвици на американската банка се наведува дека последната фаза веќе е пристигната за рускиот претседател Владимир Путин и украинскиот претседател Володимир Зеленски, објави веб-страницата на банката.

Трајноста на секој договор зависи и од тоа колку Путин е задоволен од западните и украинските отстапки, како и од силата на безбедносните гаранции што ќе го придружуваат договорот, се вели во извештајот.

Во анализата се наведени четири можни сценарија за мировни преговори, со паралели со другите конфликти и проценка на веројатноста за секој од нив.

Сепак, ниту едното сценарио не претпоставува дека Украина ќе ја врати целосната контрола на својата територија или ќе се приклучи на НАТО.

Сценарио „Грузија“
Аналитичарите сметаат дека најверојатен исход, со 50 проценти шанса, е сценариото „Грузија“. Во тој случај, Украина не би добила ниту странски војници ниту значителна воена поддршка, што би ја оставило земјата изложена на натамошна нестабилност, ќе го забави нејзиниот пат кон ЕУ и НАТО и би довело до „постепено враќање на руското влијание“.

Сценарио „Израел“
Сценариото наречено „Израел“ има 20 проценти шанси и е оценето како „сè уште прифатливо“.

Во тој случај Украина би продолжила да добива силна и долгорочна воена и економска помош од Западот, но без присуство на странски војници на теренот.

Таквата поддршка ќе и овозможи на Украина да се претвори во воена тврдина, да ја модернизира својата армија и на крајот да развие свој механизам за одвраќање, но заканата од нова војна постојано ќе виси над земјата.

Сценарија „Јужна Кореја“ и „Белорусија“
Сценариото „Јужна Кореја“ и „Белорусија“ имаат шанса од 15 проценти. Сценариото „Јужна Кореја“ предвидува стационирање на европски трупи во Украина како „сила за одвраќање“, со американска гаранција за помош и разузнавачка поддршка, што би ја стабилизирало областа под контрола на Киев, која во моментов покрива околу 80 отсто од земјата.

Спротивно на тоа, сценариото „Белорусија“ предвидува дека САД би можеле да се повлечат од обезбедувањето поддршка за Украина, додека Европа нема да успее да ја зајакне својата поддршка.

„Русија ќе се држи до своите максималистички барања и ќе бара целосна капитулација на Украина, претворајќи ја во своја вазална држава“, се вели во извештајот.

Во тоа сценарио, Русија ефективно би ја добила војната, би го поделила Западот и неповратно би го урнала поредокот воспоставен по Втората светска војна, се истакнува во извештајот.

Украина и Русија се договорија во Турција да разменат 1.000 затвореници во првите директни мировни преговори од почетокот на војната во 2022 година.