Во близина на седиштето на Министерството за одбрана на САД е забележано нагло зголемување на нарачките за храна, што веднаш предизвика шпекулации на социјалните медиуми и меѓу аналитичарите за зголемена активност во Пентагон.
Се работи за таканаречениот „индекс на пица“ – неформален, но често споменуван индикатор кој го следи бројот на нарачки од ресторани и услуги за достава во близина на Пентагон. Се верува дека неговото ненадејно зголемување може да укажува на продолжено работно време, вонредни состаноци и интензивни консултации на врвот на американската војска.
Слични скокови на овој индекс се забележани и претходно, во пресрет на големи воено-политички настани. Значително зголемување е забележано и на денот на американската операција во Венецуела, како и непосредно пред бомбардирањето на цели во Иран, поради што секој нов „врв“ привлекува дополнително внимание.
Иако нема официјална потврда од Пентагон, а ваквите индикатори немаат формална аналитичка тежина, фактот дека моделот се повторува е доволен за да ги поттикне шпекулациите дека важни одлуки се донесуваат зад затворени врати.
Аналитичарите предупредуваат дека самото зголемување на нарачките за храна не мора нужно да значи итна воена акција, но признаваат дека „индексот на пица“ се покажа како интересен сигнал за следење на периодите на зголемена безбедност и стратешка активност во текот на годините.
