Канцелариите во Луизијана и Оклахома беа евакуирани откако беа примени сомнителни пакети, додека пакет наменет за државниот секретар на Охајо беше пресретнат од поштенската служба.
Федералното биро за истраги (ФБИ) и Службата за поштенска инспекција на САД истражуваат серија писма што содржат непозната супстанца, кои биле испратени до изборни канцеларии и други адреси низ целата земја, само неколку недели пред ноемвриските конгресни избори.
Изборните канцеларии во Луизијана и Оклахома беа евакуирани откако беа примени пакети што ја содржеа прашкастата супстанца. Сличен пакет, наменет за канцеларијата на државниот секретар на Охајо, беше пресретнат од Поштенската служба на САД пред да стигне до својата дестинација.
Членовите на Сенатот на САД, исто така, беа информирани за истрагата во четврток. Во пораката добиена од Асошиејтед Прес се вели дека властите се обидуваат да пресретнат други пакети, но дека некои од нив сè уште може да стигнат до своите приматели. Затоа е издадено предупредување за третирање на сомнителната пошта како потенцијално опасна.
ФБИ ги бара одговорните
Висок функционер на Службата за поштенски инспекции, Брендан Донахју, потврди дека истрагата е во тек и рече дека заканите кон изборните службеници се неприфатливи.
ФБИ соопшти дека истражува сомнителни пакети испратени до различни адреси низ целата земја, вклучувајќи ги канцелариите на државните секретари и изборните канцеларии под нивна надлежност.
„Некои од писмата содржеа непозната супстанца. Тесно соработуваме со нашите партнери за спроведување на законот за да одговориме на секој инцидент и да утврдиме кој е одговорен за испраќањето на писмата“, се вели во соопштението.
Федералните власти сè уште не кажаа за каква супстанца станува збор.
Слични инциденти во претходните години
Националното здружение на државни секретари и Националното здружение на изборни директори изразија загриженост за овие случаи и рекоа дека заканите кон изборните службеници и работниците немаат место во демократското општество.
Слични инциденти се регистрирани за време на претходните изборни циклуси. Во септември 2024 година, сомнителни пакети што содржат бел прав пристигнаа во повеќе изборни канцеларии низ САД, што доведе до евакуации на некои локации. Една година претходно, траги од фентанил, моќен опиоид, беа пронајдени во некои пакети испратени до изборните службеници.
Најновите пакети се под истрага, додека властите работат на утврдување на нивното потекло и идентификување на одговорните.
