Немав никаква причина да живеам, веќе не можев да издржам 

Рускиот тенисер Андреј Рубљов помина низ исклучително тешки моменти. Тој ја започна сезоната како осмиот тенисер во светот, а заврши на 16. место на АТП-листата, а неодамна откри дека во текот на 2024 година се борел со сериозни ментални проблеми.

Како што призна за „Гардијан“, по Вимблдон и неговиот пораз во првото коло од тогаш 122-ри тенисер во светот, 28-годишниот Русин „немал причина да живее“.

– Сега се чувствувам многу подобро. Сè уште не сум таму каде што сакам да бидам, но конечно имам основа. По Вимблдон немав причина да живеам. Звучи драматично, но мислите во главата ме уништуваа. Немав повеќе време за тенис. Проблемот беше во мене. Не можев повеќе да се поднесам.

Рубљов се смета за некој што често покажува знаци на нервоза на своите натпревари, а не му било непознато да се удира по главата и нозете со десната рака. Признал дека разговорот со поранешниот руски тенисер Марат Сафин му бил исто така многу корисен.

– Земав антидепресиви, но тие не ми помогнаа. На крајот си реков: „Веќе не земам ништо“. Сафин ми помогна да разберам многу работи. Почнав да работам со психолог. Учам многу за себе – рече Русинот и додаде:

– Можеш да имаш сè во животот, но ако има нешто во тебе што не сакаш да го видиш, никогаш нема да бидеш среќен. Кога ќе го пронајдеш проблемот и ќе го прифатиш, ќе ти биде подобро.